هه‌رچی هه‌یه‌ با به‌شی که‌ین
هه‌رچی هه‌یه‌ با به‌شی که‌ین
کامه‌ ده‌مار خوێن بۆ به‌رۆکی خه‌م ده‌با
با ڕه‌شی که‌ین
هه‌رچی هه‌یه‌
له‌ چاولێکنان و نوستنا
له‌ ژین و ژان و مردنا
له‌ ماچی لێو و گه‌ردنا
با به‌شی که‌ین

با به‌شی که‌ین
له‌ سه‌رمه‌ست بوون
له‌ نێو خه‌یاڵی به‌ربه‌ست بوون
له‌ ڕۆژگاری شیرین و تاڵ
خه‌ون و خه‌یاڵ
خه‌وتنی سه‌رگوڵێکی ئاڵ
هه‌رچی هه‌یه‌ با به‌شی که‌ین

هه‌رچی هه‌یه
له‌ حه‌زی مه‌ست و ئاره‌زوو
له‌ یادگاری ڕۆژانی زوو
له‌ توڕه‌ بوون ، له‌ پێکه‌نین
خه‌می ئاڵێ به‌رۆکی ژین
هه‌رچیت هه‌یه‌
هه‌رچیم هه‌یه‌
با به‌شی که‌ین

هه‌رچی هه‌یه‌
با به‌شی که‌ین
خه‌می ده‌روون
جوانی گه‌ردوون
سه‌فه‌ری کانی لێڵ و ڕوون
هه‌رچی هه‌یه‌
با به‌ نیوه‌
هه‌رچیت دیوه‌ و
هه‌رچیم دیوه‌
با به‌شی که‌ین

هه‌رچی هه‌یه‌
با به‌شی که‌ین
چرای خه‌م و تاڵی ژیان
به‌ یه‌که‌وه‌ خامۆشی که‌ین
با به‌شی که‌ین
خه‌می سینه‌ بسوتێنین
ڕه‌شپۆشی که‌ین
هه‌رچیم هه‌یه‌
به‌شی ئه‌که‌م به‌س له‌گه‌ڵ تۆ
هه‌رچیت هه‌یه‌
بێنه‌ به‌شم به‌شم مه‌خۆ